【河上鄉首個環誌記錄——燕雀及朱背啄花鳥】

繼上次環誌極度瀕危黃胸鵐後，河上鄉鳥類環誌團隊近日又有驚喜收穫——成功環誌一對燕雀同一隻朱背啄花鳥，佢哋更屬河上鄉首個環誌紀錄！

燕雀係香港稀少過境遷徙鳥，主要食種子同果實，經常出沒於開闊原野。無論雌雄鳥均胸帶橙色、肩帶白斑。雄鳥顏色較鮮明，以吸引異性。秋季雄鳥會搖身一變，換上呈玳瑁色嘅全新羽毛；然而夏季則因頭頂羽毛耗損，令橙棕色邊緣慢慢消失，取而代之係全黑色嘅繁殖羽。以往紀錄主要分佈喺蒲台、塱原及米埔等地區，較常見於秋季。

至於朱背啄花鳥體型細小，因習慣棲息喺樹冠上，所以環誌史上鮮有紀錄。今次環誌團隊有幸環誌嘅個體為成年雄鳥，鮮明嘅朱紅色由頭部一直延伸至腰部，非常搶眼！

河上鄉生境管理團隊一直希望透過維持多樣化生境，包括種植稻米田、維持淺水池及濕耕農地等淡水濕地，以及保育風水林等，為不同物種提供覓食同棲身地。而要評估生境管理成效，持續嘅環境監測至關重要。尤其係多變嘅自然環境中，必須定期根據環境現況及變化，調整生境管理措施，先可以締造合適雀鳥安居嘅生境。

鳥類環誌作為環境監測其中一環，目的係希望收集更全面數據，補足單一調查方法嘅缺失，例如調查員較難透過樣線調查，觀察到較怕人、匿入稻米田覓食嘅鵐科雀鳥。當然，如果能夠得到大家提供嘅公民科學數據，將有助團隊了解更真實嘅鳥況～

今次好高興見到不同雀鳥使用我哋管理嘅生境，推動我哋未來繼續努力，同多位在地農夫及義工攜手合作，提升河上鄉生物多樣性。

*據《野生動物保護條例》，任何人未經許可，不得捕捉或故意干擾任何野生雀鳥，否則即屬違法。我們的鳥類環誌員已獲得漁農自然護理署發出的特別許可證，並受過專業訓練，一切以雀鳥為先。

計劃︱河上鄉自然保育管理計劃
主辦︱長春社、香港觀鳥會
資助︱鄉郊保育資助計劃、鄉郊保育辦公室

#長春社 #香港觀鳥會 #禾花雀生態農社
#CCO / #CountrysideConservationOffice / #鄉郊保育辦公室 / #CCFS / #CountrysideConservationFundingScheme / #鄉郊保育資助計劃